उत्तराखण्डमा हेलिकप्टर दुर्घटना : ५ जनाको ज्यान गयो
उत्तराखण्डको उत्तरकाशीमा हेलिकप्टर दुर्घटनामा ५ जनाको मृत्यु, २ घाइते। देहरादुनबाट हर्सिल गइरहेको हेलिकप्टर गंगोत्री नजिक दुर्घटनाग्रस्त। खराब मौसम मुख्य कारणको आशंका।
थर्ड पोल
भारतको उत्तराखण्ड राज्य अन्तर्गत उत्तरकाशीमा आज बिहान एक निजी हेलिकप्टर दुर्घटनामा परेपछि पाँच जनाको मृत्यु भएको छ भने दुई जना गम्भीर घाइते भएका छन्। दुर्घटना देहरादुनबाट हर्सिलतर्फ जाँदै गरेको हेलिकप्टर गंगोत्रीभन्दा पर भागिरथी नदीको किनारमा रहेको पहाडी क्षेत्रमा भएको हो।
सात जना सवारमध्ये दुई मात्र बाँचे, अवस्था गम्भीर
समाचार एजेन्सी एएनआईका अनुसार, हेलिकप्टरमा जम्मा सात जना सवार थिए। तीमध्ये पाँच जनाको घटनास्थलमै मृत्यु भएको पुष्टि भएको छ भने बाँकी दुई जना गम्भीर अवस्थामा छन्। मृतक र घाइतेहरुको पहिचान भने सार्वजनिक गरिएको छैन।
खराब मौसम नै कारण? अनुसन्धान सुरु
दुर्घटनाको वास्तविक कारण अझै खुलेको छैन। तर प्रारम्भिक अनुमान अनुसार लगातार खराब मौसमका कारण हेलिकप्टरले सन्तुलन गुमाएको हुनसक्ने बताइएको छ। भारतीय मौसम विज्ञान विभागले यस क्षेत्रका लागि पहिल्यै पानी र हावाहुरीको चेतावनी जारी गरेको थियो। उत्तराखण्डका मुख्यमन्त्री पुष्करसिंह धामीले घटनाको अनुसन्धान गर्न सम्बन्धित अधिकारीलाई निर्देशन दिएका छन्।
