हुम्लाको तिलगाउँमा आएको बाढी अध्ययन गर्न प्राधिकरणको टोली प्रस्थान

हुम्लाको नाम्खा गाउँपालिका–६, तिलगाउँमा हालै आएको बाढीको अध्ययन गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणको टोली हुम्ला जाँदैछ। डिभिजन इन्जिनियर सुशील श्रेष्ठको नेतृत्वमा रहेको पाँच सदस्यीय प्राविधिक टोलीमा भूगर्भविद् र जलस्रोतविद् पनि समावेश छन्।

प्राधिकरणका प्रवक्ता रामबहादुर केसीका अनुसार टोली आइतबार नेपालगञ्ज पुगिसकेको छ र आज सिमकोट हुँदै तिलगाउँतर्फ प्रस्थान गर्नेछ। टोलीले पैदल यात्रा गरी बाढी प्रभावित क्षेत्रको प्रत्यक्ष अध्ययन गर्नेछ।

प्रारम्भिक विवरणअनुसार तिलगाउँभन्दा करिब ३.५ किलोमिटर माथि रहेको हिउँभित्रको एक ताल पग्लिएर पानी खोल्सीमार्फत बग्दा बाढी आएको हो। तथापि, तालबाट ठूलो मात्रामा पानी कसरी बाहिरियो र आगामी दिनमा थप जोखिम के–के हुनसक्छ भन्ने विषयमा विस्तृत अध्ययन गर्न टोली खटाइएको केसीले जानकारी दिनुभयो।

यसबीच, बाढीबाट प्रभावित १८ परिवारका ३२ जना अझै पनि राहतको प्रतीक्षामा छन्। उनीहरू हाल हिमशिखर आधारभूत विद्यालय र त्रिपालको आश्रयमा बसिरहेका छन्। पीडितहरूले घरबाटै खाना लिएर आउनुपर्ने बाध्यतामा छन्।

हुम्लाका प्रमुख जिल्ला अधिकारी नारायण पाण्डेयका अनुसार राहत सामग्री — चामल, नुन, तेल, मैदा, चिउरा, चिनी, चियापत्ति आदि — घोडा, खच्चर तथा मानव बोक्ने माध्यमबाट पठाइएको छ। राहत सामग्री आज प्रभावित क्षेत्रमा वितरण गरिने जनाइएको छ।